ପୁରୀର ରୂପାନ୍ତରଣ ପାଇଁ ରାଜ୍ୟ ସରକାରଙ୍କ କାର୍ଯ୍ୟ ପ୍ରଶଂସନୀୟ

ଭୁବନେଶ୍ବର () ପୁରୀକୁ ବିଶ୍ବସ୍ତରୀୟ ଐତିହ୍ୟ ସହରରେ ରୂପାନ୍ତରିତ କରିବାକୁ ରାଜ୍ୟ ସରକାର ଯେଉଁ କାର୍ଯ୍ୟକ୍ରମ ଆରମ୍ଭ କରିଛନ୍ତି ତାହା ନିୟମ ଅନୁଯାୟୀ ଚାଲିଛି। ସମସ୍ତଙ୍କ ସୁରକ୍ଷା ଓ ପୁରୀର ବିକାଶ ପାଇଁ ରାଜ୍ୟ ସରକାରଙ୍କ କାର୍ଯ୍ୟ ପ୍ରଶଂସନୀୟ । ଏହାଦ୍ବାରା କାହାର କ୍ଷତି ହେବନି, ବରଂ ଲାଭ ହେବ । ଏହାଦ୍ବାରା ପୁରୀର ବିକାଶ ହେବା ସହ ଅଧିକରୁ ଅଧିକ ଭକ୍ତଙ୍କ ଆଗମନ ହେବ ଏବଂ ପୁରୀକୁ ଐତିହ୍ୟ ସହରରେ ରୂପାନ୍ତରିତ କାର୍ଯ୍ୟ ପ୍ରଶଂସନୀୟ । ଆଜି ପୁରୀ ଗସ୍ତରେ ଆସିଥିବା ଆମିକସ କ୍ୟୁରି ରଂଜିତ କୁମାର ରାଜ୍ୟ ସରକାରଙ୍କୁ ଏହି ସାର୍ଟିଫିକେଟ ଦେଇଛନ୍ତି ।

ପୁରୀରେ ବର୍ତ୍ତମାନ ଚାଲିଥିବା ଜବରଦଖଲ ଉଚ୍ଛେଦ କାର୍ଯ୍ୟ ଠିକଠାକ ଚାଲିଛି । କାହାକୁ ଜବରଦସ୍ତ ଉଚ୍ଛେଦ କରାଯାଉନି । ସବୁକିଛି ଆଲୋଚନା ଓ ଆପୋଷ ବୁଝାମଣା ଜରିଆରେ ହେଉଛି । 25 ବର୍ଷରେ ଥରେ ହେଉଥିବା ନାଗାର୍ଜୁନ ବେଶ ଆସନ୍ତା ବର୍ଷ ଅନୁଷ୍ଠିତ ହେବ । ଏଥିପାଇଁ ଲକ୍ଷାଧିକ ଭକ୍ତଙ୍କ ସମାଗମ ହେବ । ପାଖାପାଖି ୧୫ ଲକ୍ଷଙ୍କ ଭକ୍ତ ସମାଗମ ହେବାର ସମ୍ଭାବନା ରହିଛି । ଏନେଇ ଶ୍ରୀମନ୍ଦିର ଆଖପାଖରେ ସ୍ବଚ୍ଛତା ଜରୁରୀ । ପୁରୀର ଉନ୍ନତି ପାଇଁ ଏହି ପଦକ୍ଷେପ ନିଆଯାଉଛି ବୋଲି ସେ କହିଛନ୍ତି ।

ପୁରୀରେ ପହଁଚିଥିବା ଆମିକସ କ୍ୟୁରୀ ଓ ସିଲିସିଟର ଜେନେରାଲ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ସାଧାରଣ ଲୋକ, ବ୍ୟବସାୟୀ ଓ ଦୋକାନୀଙ୍କ ଆପତ୍ତି ଅଭିଯୋଗ ଶୁଣୁଛନ୍ତି । ଏହା ସହିତ ଶ୍ରୀମନ୍ଦିର ପ୍ରଶାସନର ଅଧିକାରୀଙ୍କ ସହ ଆଲୋଚନା ମଧ୍ୟ କରିଛନ୍ତି । ଏହା ପୂର୍ବରୁ ରାଜ ନଅରରେ ଗଜପତି ମହାରାଜଙ୍କ ସହ ଆଲୋଚନା କରଥିଲେ ଆମିକସକ୍ୟୁରୀ ଓ ସିଲିସିଟର ଜେନେରାଲ୍ । ଆମିକସ କ୍ୟୁରୀ ଓ ସିଲିସିଟର ଜେନେରାଲଙ୍କ ସହ ପୁରୀ ଜିଲ୍ଲାପାଳ ବଲୱନ୍ତ ସିଂହ, ଏସପି ଉମାଶଙ୍କର ଦାଶ ଓ କେନ୍ଦ୍ରାଂଚଳ ଜିଆଇଜି ଆଶିଷ ସିଂହ ଅଛନ୍ତି । ଶ୍ରୀକ୍ଷେତ୍ର ପୁରୀରେ ଶ୍ରୀମନ୍ଦିର ଠାରୁ ୭୫ ମିଟର ଭିତରେ ଉଚ୍ଛେଦ ଚାଲିଥିବା ବେଳେ ଓ ଏହାକୁ ନେଇ ବିରୋଧ ଦେଖାଦେଇଥିଲା। ଆଉ ଏହା ମଧ୍ୟରେ ପୁରୀରେ ପହଂଚିଥିଲେ ଆମିକସକ୍ୟୁରୀ ଓ ସଲିସିଟର ଜେନେରାଲ । ଆଜି ସକାଳ ସାଢେ ୭ଟା ଶ୍ରୀମନ୍ଦିରରେ ପହଁଚିଛନ୍ତି ଆମିକସକ୍ୟୁରୀ ରଂଜିତ୍ କୁମାର ଓ ସିଲିସିଟର ଜେନେରାଲ ତୁଷାର ମେହଟା । ପୁରୀରେ ପହଁଚିବା ପରେ ଚାହଁଣି ମଣ୍ଡପରୁ ଉଭୟ, ଉଛେଦ କାର୍ଯ୍ୟର ଅନୁଧ୍ୟାନ କରିଥିଲେ।

ବିଭିନ୍ନ ବର୍ଗ ସହ ଆଲୋଚନା ଓ ଅନୁଧ୍ୟାନ ପରେ ରାଜ୍ୟ ସରକାରଙ୍କ କାର୍ଯ୍ୟକୁ ସେନେଇ ସେ ସନ୍ତୋଷ ପ୍ରକାଶ କରିଛନ୍ତି । ପୁରୀର ସର୍ବାଙ୍ଗିନ ବିକାଶ ଓ ଏହାକୁ ଏକ ଐତିହ୍ୟ ସହରରେ ରୂପାନ୍ତରିତ କରିବାକୁ ରାଜ୍ୟ ସରକାର ସମୁଚିତ ପଦକ୍ଷେପ ନେଇଥିବା ସେ କହିଛନ୍ତି ।

ଆମିକସ କ୍ୟୁରି କହିଛନ୍ତି ଯେ, ରାଜ୍ୟ ସରକାରଙ୍କ ଦ୍ବାରା ପୁରୀରେ ଚାଲିଥିବା ମେଘନାଦ ପାଚେରୀରୁ 75 ମିଟର ଦୂରତାରେ ଜବରଦଖଲ ଉଚ୍ଛେଦ ଅଭିଯାନର ସମୀକ୍ଷା କଲି ଓ ସ୍ଥାନାନ୍ତରିତ ବାସିନ୍ଦା ଓ ବ୍ୟବସାୟୀଙ୍କ ସହ ସାକ୍ଷାତ କରି ଆଲୋଚନା କରିଛି । ସରକାର ବାସ୍ତବରେ ଭବିଷ୍ୟତକୁ ଦୃଷ୍ଟିରେ ରଖି ଏଭଳି ଐତିହାସିକ ନିଷ୍ପତ୍ତି ନେଇଛନ୍ତି । ପୁରୀ ସହର ପରିସ୍କାର ପରିଚ୍ଛନ ହେବା ସହ ଅଧିକ ସୁରକ୍ଷିତ ହେବା ଦ୍ବାରା ଅଧିକ ଭକ୍ତଙ୍କ ଆଗମନ ହୋଇପାରିବ । ଉଚ୍ଛେଦ ପରେ ସରକାର ଉପଯୁକ୍ତ କ୍ଷତିପୂରଣ ବ୍ୟବସ୍ଥା କରିଛନ୍ତି । ଆଗକୁ ଏହାର ସୁଫଳ ସମସ୍ତେ ପାଇବେ ବୋଲି ସେ କହିଛନ୍ତି ।