ଏବର୍ଷ ସରିବ ଲାଞ୍ଜିଗଡ଼ ରୋଡ଼-ଜୁନାଗଡ଼ ରୋଡ଼ ଓ ନୌପଡା-ଗୁଣୁପୁର ରେଳବାଇ ବିଦ୍ୟୁତିକରଣ କାର୍ୟ୍ୟ

ଭୁବନେଶ୍ବର () ବିଜୟନଗରମ-ଟିଟିଲାଗଡ଼-ରାଇପୁର ରେଳ ଲାଇନର ୫୬ କିମି ଲମ୍ବା ଲାଞ୍ଜିଗଡ଼ ରୋଡ଼-ଜୁନାଗଡ଼ ରୋଡ଼ ରେଳ ସେକ୍ସନରେ ଏବଂ ହାଓଡ଼ା-ଚେନ୍ନାଇ ମୁଖ୍ୟ ରେଳ ଲାଇନର ୯୦କିମି ଲମ୍ବା ନୌପଡା-ଗୁଣୁପୁର ରେଳ ସେକ୍ସନରେ ବିଦ୍ୟୁତିକରଣ କାର୍ୟ୍ୟ ଖୁବ ଶୀଘ୍ର ଶେଷ ହେବ ଏବଂ ଏଥିପାଇଁ ଯୁଦ୍ଧକାଳୀନ ଭିତ୍ତିରେ କାର୍ୟ୍ୟ ସମ୍ପାଦନ କରାଯାଉଅଛି ।

ଲାଞ୍ଜିଗଡ଼ ରୋଡ଼-ଜୁନାଗଡ଼ ରୋଡ଼ ରେଳ ସେକ୍ସନରେ ୫୬ କିମି ରେଳ ଲାଇନ ପାଇଁ ବିଦ୍ୟୁତିକରଣ ବାବଦରେ ପ୍ରାୟ ୬୨ କୋଟି ଟଙ୍କାଖର୍ଚ କରାଯାଉଥିବା ବେଳେ ନୌପଡା-ଗୁଣୁପୁର ରେଳ ସେକ୍ସନରେ ୯୦ କିମି ରେଳ ଲାଇନ ପାଇଁ ବିଦ୍ୟୁତିକରଣ ବାବଦରେ ପ୍ରାୟ ୧୦୫ କୋଟି ଟଙ୍କା ଖର୍ଚ୍ଚ କରାଯାଉଅଛି ।

ବର୍ତମାନ ସମ୍ବଲପୁର ରେଳ ମଣ୍ଡଳରେ ବିଭିନ୍ନ ରେଳ ସେକ୍ସନ ଯଥା ଝାରସୁଗୁଡା-ସମ୍ବଲପୁର, ସମ୍ବଲପୁର-ଅନୁଗୁଳ, ସମ୍ବଲପୁର-ଟିଟିଲାଗଡ଼, ଟିଟିଲାଗଡ଼-ସିଙ୍ଗାପୁର ରୋଡ଼ ଏବଂ ଟିଟିଲାଗଡ଼-ରାଇପୁର ରେଳ ସେକ୍ସନ ମାନଙ୍କରେ ବିଦ୍ୟୁତିକରଣ କାର୍ୟ୍ୟ ସମାପ୍ତ କରାଯାଇ ଇଲେକ୍ଟ୍ରିକ ରେଳ ଇଞ୍ଜିନ ଦ୍ବାରା ଟ୍ରେନ ଚଳାଚଳ କରୁଅଛି ଓ ଏହା ବ୍ୟତୀତ, ଟିଟିଲାଗଡ଼-ରାଇପୁର ରେଳ ସେକ୍ସନର ବେଲସୋଣ୍ଡା-କୋମାଖନ-ଖରିଆର ରୋଡ଼ ରେଳ ସେକ୍ସନରେ କାର୍ୟ୍ୟ ଚଳିତ ମାସ ଶେଷ ସୁଦ୍ଧା ସମାପ୍ତ ହୋଇଯିବ ।

ଏହା ସହିତ ଚାଲୁ ରହିଥିବା ଖୋର୍ଦ୍ଧା ରୋଡ଼-ବଲାଙ୍ଗୀର ରେଳ ଲାଇନ ପ୍ରକଳ୍ପରେ ଉଭୟ ପାର୍ଶ୍ୱରୁ ବିଦ୍ୟୁତିକରଣ କାର୍ୟ୍ୟ ପ୍ରାରମ୍ଭ କରାଯାଇଅଛି । ୨୮୯ କିମି ଲମ୍ବ ଏହି ରେଳପ୍ରକଳ୍ପ ପାଇଁ ପ୍ରାୟ ୨୬୫ କୋଟି ଟଙ୍କା ବ୍ୟୟ କରାଯିବ ।

ପୂର୍ବତଟ ରେଳପଥ ମଧ୍ୟରେ ଏହି ସବୁ ରେଳ ସେକ୍ସନରେ ବିଦ୍ୟୁତିକରଣ କାର୍ୟ୍ୟ ସମ୍ପାଦନ ପରେ ଡିଜେଲ ଇଞ୍ଜିନ ପରିବର୍ତ୍ତେ ଇଲେକ୍ଟ୍ରିକ ଇଞ୍ଜିନ ଦ୍ବାରା ଟ୍ରେନ ଚଳାଚଳ କରିବ । ଏହା ଟ୍ରେନ ମାନଙ୍କର ବେଗ ବୃଦ୍ଧି କରିବା ସହିତ ଡିଜେଲ ବାବଦରେ ବ୍ୟୟ କମ କରିବ ଏବଂ କମ ଖର୍ଚ୍ଚରେ ଟ୍ରେନ ଚଳାଚଳ କରିବ ।

ଚଳିତ ବର୍ଷ ଡିସେମ୍ବର ମାସ ୩୧ ତାରିଖ ଠାରୁ ଏହି ପ୍ରକଳ୍ପ ଗୁଡିକର କାର୍ୟ୍ୟ ସମ୍ପାଦନ ହେବ ଦ୍ବାରା ଏଥିରେ ବିଦ୍ୟୁତ ସଂଯୋଗ କରାଯାଇ ଚାର୍ଜ କରାଯିବ ଏବଂ ସାଧାରଣ ଜନତା ଓ ରାସ୍ତା ବ୍ୟବହାରକାରୀ ମାନଙ୍କ ସହିତ ବାହାନ ଚାଳକ ମାନେ ଟ୍ରେନ ଲାଇନ ପାଖରେ କିମ୍ବା ପାରିହେବା ସମୟରେ ବିଶେଷ ସତର୍କତା ଅବଲମ୍ବନ କରିବାକୁ ପୂର୍ବତଟ ରେଳପଥ ପକ୍ଷରୁ କୁହାଯାଇଅଛି ।