କଳିଆ ପାଣ୍ଠିକୁ ନେଇ ଅପପ୍ରଚାର କରୁଛନ୍ତି ବିରୋଧୀ

ଜରୁରୀ ପାଣ୍ଠି ଖର୍ଚ୍ଚର ହିସାବ ଦେଲା ବିଜେଡି 

ଭୁବନେଶ୍ୱର () ରାଜ୍ୟ ସରକାର ଆଣିଥିବା ଜନହିତକାରୀ ଯୋଜନାଗୁଡିକ ଭଳି କାଳିଆ ମଧ୍ୟ ବେଶ୍ ଫଳପ୍ରଦ ହେବ ଏବଂ ଏହାଦ୍ୱାରା ରାଜ୍ୟ ଅର୍ଥନୀତି ପଛେଇବ ନାହିଁ କିମ୍ବା ରାଜ୍ୟବାସୀଙ୍କ ମୁଣ୍ଡ ପିଛା ଋଣ ବଢ଼ିବ ନାହିଁ । ଆଜି ‘କାଳିଆ’ ଯୋଜନାର ଲୋକପ୍ରିୟତା କେବଳ ଓଡ଼ିଶା ମଧ୍ୟରେ ସୀମିତ ନାହିଁ, ବରଂ ଦେଶବ୍ୟାପୀ ଏହାକୁ ନେଇ ଚର୍ଚ୍ଚା ହେଉଛି । ଏମିତି କି କେନ୍ଦ୍ର ସରକାର ମଧ୍ୟ ଏହି ଯୋଜନା ପ୍ରତି ଆକର୍ଷିତ ହୋଇ ଏଭଳି ଅନୁରୂପ ଏକ ଯୋଜନା ଆଣି ଦେଶର ଚାଷୀମାନଙ୍କୁ ବିପଦରୁ ଉଦ୍ଧାର କରିବା ପାଇଁ ବିଚାର କରୁଥିବା ଜଣାଯାଏ । ସଂପ୍ରତି ଅଧିକାଂଶ ରାଜ୍ୟର ସରକାର ଚାଷୀମାନଙ୍କ ଉପରେ ବାକି ଥିବା ଋଣକୁ ଛାଡ଼ କରିବା ପାଇଁ ପଛାଉ ନାହାନ୍ତି । ଉଦାହରଣ ଭାବେ ଛତିଶଗଡ଼, ରାଜସ୍ଥାନ, ମଧ୍ୟପ୍ରଦେଶ ଭଳି ରାଜ୍ୟକୁ ନିଆଯାଇପାରେ । କିନ୍ତୁ ଓଡ଼ିଶାର ନବୀନ ପଟ୍ଟନାୟକ ସରକାର ବିଭିନ୍ନ ଦିଗକୁ ପୁଙ୍ଖାନୁପୁଙ୍ଖ ଭାବେ ଯାଞ୍ଚ କରିବା ପରେ ‘କାଳିଆ’ ଭଳି ଏକ ଅନନ୍ୟ ଯୋଜନା ହାତକୁ ନେଇଛନ୍ତି । ଏହାଦ୍ୱାରା ରାଜ୍ୟ ଚାଷୀମାନଙ୍କର ବିକାଶ ହେବା ସହ ରାଜ୍ୟ ଅର୍ଥନୀତିକୁ ମଧ୍ୟ ସେମାନଙ୍କ ଅବଦାନ ବଢ଼ିବ ବୋଲି ଆଶା କରାଯାଉଛି ।ଚାଷୀମାନଙ୍କ ସମସ୍ୟାର ପ୍ରତିକାର ପାଇଁ ଏହା ଅତ୍ୟନ୍ତ ଜରୁରୀ ହୋଇପଡିଥିଲା ଏବଂ ସରକାର ଏହି ପଦକ୍ଷେପକୁ ଉଚିତ୍ ମଣୁଛନ୍ତି ବୋଲି ଆଜି ଏକ ସାମ୍ବାଦିକ ସମ୍ମିଳନୀରେ ବିଜେଡି ନେତା ଅରୂପ ପଟନାୟକ ଓ ମାନସ ମଙ୍ଗରାଜ କହିଛନ୍ତି ।

ସରକାର ଜରୁରୀକାଳୀନ ପାଣ୍ଠିର ଦୁରୁପଯୋଗ କରିଛନ୍ତି ବୋଲି ବିରୋଧୀ ଦଳଗୁଡିକ ଯେଉଁଭଳି ଭାବେ ଅଭିଯୋଗ କରୁଛନ୍ତି, ତାହା ଆଦୌ ଯୁକ୍ତିଯୁକ୍ତ ନୁହେଁ । ଜରୁରୀକାଳୀନ ସମୟରେ ଏହି ପାଣ୍ଠି ବ୍ୟବହାର କରାଯିବା ଉଚିତ୍ ଥିଲା ଏବଂ ସରକାର ତାହା ହିଁ କରିଛନ୍ତି । ଅନ୍ୟପକ୍ଷରେ ସରକାର ମନମୁଖି ଭାବେ ଏଭଳି ଆଦୌ କରିନାହାନ୍ତି, ବରଂ ଆଇନ୍ର କ୍ଷେତ୍ରାଧିକାରରେ ରହି ଏହି ବଳିଷ୍ଠ ପଦକ୍ଷେପ ନେଇଛନ୍ତି ।