ଭୁବନେଶ୍ୱରରେ ଜାପାନ ଶିଳ୍ପ କ୍ଲଷ୍ଟର ଓ ଟାଉନସିପ
ଭୁବନେଶ୍ୱର () ରାଜ୍ୟରେ ଇସ୍ପାତ ଶିଳ୍ପର ବିକାଶ ପାଇଁ ଜାପାନ ପୁଂଜିନିବେଶ କରିବ । ଆଗାମୀ ଦିନରେ ଦେଶର ଇସ୍ପାତ ଉତ୍ପାଦନ ବୃଦ୍ଧିରେ ଜାପାନ ଏକ ବଡ ଅଂଶିଦାର ହେବ । ଏଥିସହିତ ଭୁବନେଶ୍ୱରରେ ଏକ ଜାପାନ ଶିଳ୍ପ କ୍ଲଷ୍ଟର ଓ ଟାଉନସିପର ବିକାଶ ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଜାପାନ ପ୍ରତିନିଧି ଦଳକୁ ପ୍ରସ୍ତାବ ଦେଇଛନ୍ତି । ଏହି କ୍ଲଷ୍ଟର ଏବଂ ଟାଉନସିପ ପାଇଁ ରାଜ୍ୟ ସରକାର ସବୁ ପ୍ରକାର ସହାୟତା ଯୋଗାଇଦେବେ ।
ଆଜି ଲୋକସେବା ଭବନରେ ଜାପାନର ରାଷ୍ଟ୍ରଦୂତ, କେନ୍ଦ୍ର ଇସ୍ପାତ ମନ୍ତ୍ରୀ ଏବଂ ଇସ୍ପାତ ମନ୍ତ୍ରଣାଳୟର ବରିଷ୍ଠ ଅଧିକାରୀଙ୍କ ସହ ମୁଖ୍ୟମନ୍ତ୍ରୀ ଆଲୋଚନା କରିଛନ୍ତି । ଆଲୋଚନା ପରେ ଜାପାନକୁ ଆସନ୍ତା ମେକ ଇନ ଓଡିଶା କନକ୍ଲେଭରେ ଅଂଶିଦାର ହେବାକୁ ମୁଖ୍ୟମନ୍ତ୍ରୀ ପ୍ରସ୍ତାବ ଦେଇଛନ୍ତି । ୨୦୧୮ ମେକ ଇନ ଓଡିଶା କନକ୍ଲେଭରେ ମଧ୍ୟ ଜାପାନ ଅଂଶିଦାର ଥିଲା । ଆଲୋଚନା ସମୟରେ ମୁଖ୍ୟମନ୍ତ୍ରୀ କହିଥିଲେ ଯେ, ଓଡିଶା ହେଉଛି ଦେଶରେ ସର୍ବବୃହତ ଇସ୍ପାତ ଉତ୍ପାଦନକାରୀ ରାଜ୍ୟ ଏବଂ ଆନୁସଙ୍ଗିକ ଭିତ୍ତିଭୂମୀ ବିକାର ପର୍ଯ୍ୟାପ୍ତ ସୁଯୋଗ ରହିଛି । ଜାପାନ ପ୍ରତିନିଧିଙ୍କୁ ଓଡିଶାରେ ଅଟୋମୋବାଇଲ, ଖାଦ୍ୟ ପ୍ରକ୍ରିୟାକରଣ, ରସାୟନ ଏବଂ ପେଟ୍ରୋକେମିକାଲ କ୍ଷେତ୍ରରେ ପୁଂଜିନିବେଶ କରିବାକୁ ମୁଖ୍ୟମନ୍ତ୍ରୀ ଆହ୍ୱାନ ଦେଇଛନ୍ତି ।
ଓଡିଶାର ଇସ୍ପାତ ଶିଳ୍ପରେ ଜାପାନର ଦୁଇଟି ବଡ ଇସ୍ପାତ କମ୍ପାନୀ ପୁଞ୍ଜି ନିବଶେ କରିବେ । ଶିଳ୍ପ ଅଭିବୃଦ୍ଧିରେ ଜାପାନ ସହଯୋଗୀ ହେବ ବୋଲି ଆଜି ଲୋକସେବା ଭବନ ଠାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଓ ଜାପାନ ରାଷ୍ଟ୍ରଦୂତ ସତୋଷୀ ସୁଜିକିଙ୍କ ସହ ଆଲୋଚନା ପରେ କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଆର୍ସେଲର ମିତଲ ପ୍ଲାଣ୍ଟ ନେବାପରେ ନିପନ ଷ୍ଟିଲ ଏଥିରେ ବଡ ସହଯୋଗୀ ହୋଇଛି । ଏହା ସହ ଜାପାନର ଇସ୍ପାତ କମ୍ପାନୀ ଜେଏଫ୍ଇ ଜେଏସ୍ଡବ୍ଲ୍ୟୁ ସହ ସହଭାଗୀ ହୋଇଛି । ଓଡିଶାର ଇସ୍ପାତ ଶିଳ୍ପରେ ଜାପାନର ଦୁଇଟି ବଡ ଇସ୍ପାତ କମ୍ପାନୀ ଜେଏଫ୍ଇ ଏବଂ ନିପନ ପୁଞ୍ଜି ନିବେଶ କରିବେ ।
ଆଗାମୀ ଦିନରେ ଦେଶରେ ଇସ୍ପାତ ଉତ୍ପାଦନକୁ ବାର୍ଷିକ ୧୪୦ ନିୟୁତ ଟନ୍ରୁ ୩୦୦ ନିୟୁତ ଟନ୍ କରାଯିବ । ଦେଶରେ ଇସ୍ପାତ ଉତ୍ପାଦନରେ ଯେଉଁ ବ୍ୟାପକ ଅଭିବୃଦ୍ଧି ହେବ ସେଥିରେ ଓହିଶାର ସିଂହ ଭାଗ ରହିବ । କେବଳ ଇସ୍ପାତ ନୁହେଁ ଏଥି ସହ ଜଡିତ ଶିଳ୍ପର ସମ୍ପ୍ରସାରଣ ଓଡିଶାରେ ହେଲେ ରାଜ୍ୟର ରାଜସ୍ୱ ବଢିବା ସହିତ ଅଧିକ ରୋଜଗାର ସୁଯୋଗ ସୃଷ୍ଟିହେବ । ଏଥିପାଇଁ ଜାପାନକୁ ସହଯୋଗୀ ଭାବେ ନେବା ମୂଳ ଉଦ୍ଦେଶ୍ୟ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ।
ଆଜିର ଆଲୋଚନାରେ ଓଡିଶାରେ ଥିବା ବିଭିନ୍ନ ସୁବିଧାର ବିସ୍ତୃତ ବିବରଣୀ ଜାପାନ ରାଷ୍ଟ୍ରଦୂତଙ୍କୁ ପ୍ରଦାନ କରାଯାଇଛି । କେବଳ ପର୍ଯ୍ୟଟନ, ଇସ୍ପାତ ଶିଳ୍ପ ନୁହେଁ, କୃଷି, ହସ୍ତତନ୍ତ, ପେଟ୍ରୋକେମିକାଲ୍ସ କ୍ଷେତ୍ରରେ ବ୍ୟାପକ ଆଲୋଚନା କରି ଜାପାନ ଓ ଭାରତ ସରକାରଙ୍କ ସହଯୋଗରେ ଓଡିଶାର ବିକାଶ କରାଯାଇ ପାରିବ ବୋଲି ଶ୍ରୀ ପ୍ରଧାନ କହିଛନ୍ତି । ଏଥି ସହିତ ଚଳିତ ବର୍ଷର ମେକ ଇନ୍ ଓଡିଶା କନକ୍ଲେଭରେ ଜାପାନ ସହଯୋଗ ହେବା ନେଇ ଅନୁରୋଧ କରାଯାଇଛି । ଆଜିର ଏହି ଉଚ୍ଚସ୍ତରୀୟ ବୈଠକରେ କେନ୍ଦ୍ର ଓ ରାଜ୍ୟ ସରକାରଙ୍କ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ ।
