ଆଜିଠୁ ଆରମ୍ଭ ବାଲିଯାତ୍ରା,୧୦ ଦିନ ଧରି ଚାଲିବ
ଆଜିଠୁ ଆରମ୍ଭ ହେଉଛି କଟକର ଐତିହାସିକ ବାଲିଯାତ୍ରା । ଦେଶର ସର୍ବବୃହତ୍ ମୁକ୍ତାକାଶ ବାଣିଜ୍ୟିକ ମେଳା କୁହାଯାଉଥିବା ଏହି ମେଳା ଚଳିତବର୍ଷ ପ୍ରଥମ ଥର ଦଶଦିନ ଧରି ଚାଲିବ । ଆଜି ସଂଧ୍ୟାରେ ବୈଷ୍ଣବ ପାଣି ମଂଚରୁ ବାଲିଯାତ୍ରା କଟକ ଉତ୍ସବ-୨୦୧୮ ଉଦଘାଟନ ହେବ । ସ୍ବାସ୍ଥ୍ୟମନ୍ତ୍ରୀ ପ୍ରତାପ ଜେନା, ପର୍ୟ୍ୟଟନ ମନ୍ତ୍ରୀ ଅଶୋକ ପଣ୍ଡା ଓ ମନ୍ତ୍ରୀ ଚନ୍ଦ୍ରସାରଥୀ ବେହେରା ମିଳିତ ଭାବେ ଏହାକୁ ଉଦଘାଟନ କରିବାର କାର୍ୟ୍ୟକ୍ରମ ରହିଛି । ଡିସେମ୍ବର ୨ ତାରିଖରେ ବାଲିଯାତ୍ରା ଶେଷ ହେବ ।
୧୦ ଦିନ ଧରି ହେବାକୁ ଥିବା ଏହି ବାଲିଯାତ୍ରାରେ ପ୍ରତିଦିନ ସନ୍ଧ୍ୟାରେ ବାଲିଯାତ୍ରା ମଂଚରେ ପାରମ୍ପାରିକ ଲୋକନୃତ୍ୟ ସମେତ ପ୍ରତିଷ୍ଠିତ କଂଠଶିଳ୍ପୀଙ୍କ ଦ୍ୱାରା ଆକର୍ଷଣୀୟ ସଂଗୀତ ଭିତିକ କାର୍ୟ୍ୟକ୍ରମ ପ୍ରଦର୍ଶିତ ହେବ । ସେପଟେ ବାଣିଜ୍ୟିକ ମେଳା ପାଇଁ ଏଯାଏଁ ୧୦୮୬ଟି ପ୍ଲଟ୍ ଆବଂଟିତ ହୋଇସାରିଛି । ଓରମାସ ପକ୍ଷରୁ ବି ତଳ ପଡିଆରେ ୩୮୦ଟି ସ୍ୱତନ୍ତ୍ର ଷ୍ଟଲ୍ ରହିଛି । ଏଥର ଦର୍ଶକ କିଣାକିଣି ସାଙ୍ଗକୁ ସାଂସ୍କୃତିକ କାର୍ୟ୍ୟକ୍ରମ ବି ଉପଭୋଗ କରିପାରିବେ । ଡିସେମ୍ବର ୨ ତାରିଖରେ ବାଲିଯାତ୍ରା ଉଦଯାପନୀ ହେବ ।
ସେପଟେ ଆଜିଠୁ ଆରମ୍ଭହେଉଛି ଭୁବନେଶ୍ୱର ବାଲିଯାତ୍ରା । କୁଆଖାଇ ନଦୀ ପଠାରେ ପ୍ରଥମ ଥର ପାଇଁ ବାଲିଯାତ୍ରା ହେଉଛି । ନଭେମ୍ବର ୨୩ରୁ ୮ଦିନ ଧରି ଚାଲିବ ବାଲିଯାତ୍ରା । ରାଜଧାନୀବାସୀ କିଣାକିଣି ସହ ପ୍ରତି ଦିନ ସଂଧ୍ୟାରେ ସାଂସ୍କୃତିକ କାର୍ୟ୍ୟକ୍ରମ ଉପଭୋଗ କରିବେ । ସ୍ଥାନୀୟ ୫୫ଟି ଗ୍ରାମର ଗ୍ରାମବାସୀ ଏବଂ ଭୁବନେଶ୍ୱରର ସମସ୍ତ ଦୂର୍ଗାପୂଜା କମିଟିର ସଦସ୍ୟ ମିଳିତ ଭାବେ ଏହାର ଆୟୋଜନ କରୁଛନ୍ତି । ମେଳା ସ୍ଥଳରେ ୫ଶହରୁ ଅଧିକ ଷ୍ଟଲ୍ କରାଯାଇଛି ।
