ଅନ୍ତର୍ଜାତୀୟ ଆଇନର ଉଲ୍ଲଂଘନ କରୁଛି ରୁଷ

ୟୁକ୍ରେନ ରାଷ୍ଟ୍ରପତି ଭୋଲୋଡିମିର ଜେଲେଂସ୍କି ରୁଷ ବିରୋଧରେ ଯୁଦ୍ଧ ଅପରାଧ ଅଭିଯୋଗ ଆଣିଛନ୍ତି । ପୁଟିନଙ୍କ ସୈନ୍ୟବାହିନୀ ଅନ୍ତର୍ଜାତୀୟ ଆଇନର ଉଲ୍ଲଂଘନ କରି କ୍ଲଷ୍ଟର ଏବଂ ଭାକ୍ୟୁମ୍ ଭଳି ନିଷିଦ୍ଧ ବୋମା ବ୍ୟବହାର କରୁଛନ୍ତି । ଗତକାଲି ବିଳମ୍ବିତ ରାତିରେ ନିଜ ସମ୍ବୋଧନରେ ଜେଲେଂସ୍କି କହିଛନ୍ତି ରୁଷ ଦ୍ଵାରା ଯୁଦ୍ଧ ନିୟମର ଉଲ୍ଲଂଘନ ଅନ୍ତର୍ଜାତୀୟ ନ୍ୟାୟାଳୟରେ ଯାଞ୍ଚ କରାଯିବା ଉଚିତ। ସେ କହିଛନ୍ତି ଯେ ନିରୀହ ୟୁକ୍ରେନ ନାଗରିକଙ୍କୁ ହତ୍ୟା କରିଥିବାରୁ ଦୁନିଆରେ କେହି ରୁଷକୁ କ୍ଷମା କରିବେ ନାହିଁ।

ୟୁକ୍ରେନର ଦ୍ବିତୀୟ ବୃହତ୍ତମ ସହର ଖାର୍କିଭରେ ପ୍ରବେଶ କରିଥିବା ରୁଷର ସେନା ସ୍ଥାନୀୟ ଲୋକଙ୍କ ବିରୋଧର ସମ୍ମୁଖୀନ ହୋଇଥିଲେ, ଯେଉଁମାନେ ସେମାନଙ୍କର ସାମରିକ ଯାନରେ ନିଆଁ ଲଗାଇ ଦେଇଥିଲେ। ଏହାର ୨୪ ଘଣ୍ଟା ପରେ ପୁଟିନ ଖାର୍କିଭ୍ ଉପରେ ବୋମା ବର୍ଷା କରିବାକୁ ନିର୍ଦ୍ଦେଶ ଦେଇଥିଲେ। ଖାର୍କିଭକୁ କବଜା କରିବା ପାଇଁ ରୁଷର ସେନା ଅତ୍ୟନ୍ତ ବିଧ୍ବଂସକାରୀ ତଥା ଘାତକ ଅସ୍ତ୍ର ବ୍ୟବହାର କରିଥିଲା। ଏହି ସହର ରୁଷ-ୟୁକ୍ରେନ ସୀମାଠାରୁ ମାତ୍ର ୪୦ କିଲୋମିଟର ଦୂରରେ ଅବସ୍ଥିତ ଏବଂ ଏହାର ଜନସଂଖ୍ୟା ପ୍ରାୟ ୧୫ ଲକ୍ଷ | ରୁଷ ତରଫରୁ ବୋମା, ରକେଟ୍ ଏବଂ ମୋର୍ଟାର ମାଡ଼ରେ ତିନି ପିଲାଙ୍କ ସମେତ ଅତି କମରେ ୧୧ ଜଣଙ୍କର ମୃତ୍ୟୁ ହୋଇଥିବା କୁହାଯାଇଛି।

ଏକ ସାମରିକ ସୂତ୍ରରୁ ଜଣାପଡିଛି ଯେ ଖାର୍କିଭରେ ରୁଷ୍ କ୍ଲଷ୍ଟର ବୋମା ବ୍ୟବହାର କରିଥିଲା ଯାହା ଆନ୍ତର୍ଜାତୀୟ ନିୟମ ଅନୁଯାୟୀ ବେଆଇନ ଅଟେ। ବିଶେଷଜ୍ଞ କହିଛନ୍ତି ଯେ BM-21 Grad ହେଉଛି ଏକ ମଲ୍ଟିପଲ୍ ଲଞ୍ଚ୍ ରକେଟ୍ ସିଷ୍ଟମ ଯାହା ଏକ ବଡ଼ ଅଞ୍ଚଳରେ ଆକ୍ରମଣ ପାଇଁ ବ୍ୟବହାର ହୁଏ | ଏହା ଜରିଆରେ ଶତ୍ରୁ ଅଞ୍ଚଳରେ କ୍ଲଷ୍ଟର ବୋମା ପକାଯାଏ |

ବିଶେଷଜ୍ଞ କହିଛନ୍ତି ଯେ ଏହା ମୁଖ୍ୟତଃ ଶତ୍ରୁ ସୈନିକମାନଙ୍କୁ ଟାର୍ଗେଟ କରି ବ୍ୟବହାର କରାଯାଏ | ସାଧାରଣ ନାଗରିକଙ୍କ ଉପରେ ଏହାର ବ୍ୟବହାର ଯୁଦ୍ଧ ଅପରାଧ ଭାବେ ଧରାଯାଇଥାଏ । ଏହି ବେଆଇନ ବୋମା ବ୍ୟବହାର କରି ରୁଷ ୟୁକ୍ରେନର ଆବାସିକ ଅଞ୍ଚଳରେ ଆତଙ୍କ ଏବଂ ଭୟ ସୃଷ୍ଟି କରିବାକୁ ଚାହୁଁଛି। ୟୁକ୍ରେନରେ ଆମେରିକୀୟ ରାଷ୍ଟ୍ରଦୂତ ଦାବି କରିଛନ୍ତି ଯେ ରୁଷ ୟୁକ୍ରେନ ଉପରେ ଆକ୍ରମଣ କରିବା ପାଇଁ ଏକ ଭ୍ୟାକ୍ୟୁମ ବୋମା ବ୍ୟବହାର କରିଛି । ଜେନେଭା ଚୁକ୍ତି ଅନୁଯାୟୀ ଯୁଦ୍ଧରେ ଏଭଳି ବୋମାର ବ୍ୟବହାର ନିଷେଧ କରାଯାଇଛି । କିନ୍ତୁ ରୁଷ ଅନ୍ତର୍ଜାତୀୟ ଆଇନର ଖୋଲା ଉଲ୍ଲଂଘନ କରୁଛି।