କର୍ଣାଟକ ହାଇକୋର୍ଟଙ୍କ ପକ୍ଷରୁ ଇନଫୋସିସ୍ ସହ ପ୍ରତିଷ୍ଠାତା କ୍ରିସ୍ ଗୋପାଳକୃଷ୍ଣନ୍ଙ୍କ ବିରୋଧରେ ଦାୟର ଏଫଆଇଆର ଖାରଜ
ଅଭିଯୋଗକୁ “ଆଇନର ପ୍ରକ୍ରିୟାର ଅପବ୍ୟବହାର’ ଭାବେ ଅଭିହିତ
ଅଭିଯୋଗକାରୀ ବିରୁଦ୍ଧରେ ଅପରାଧିକ ଅବମାନନା ମାମଲା ଆରମ୍ଭ କରିବାକୁ ଅନୁମତି
ଭୁବନେଶ୍ୱର: କର୍ଣାଟକ ହାଇକୋର୍ଟଙ୍କ ପକ୍ଷରୁ ଇନଫୋସିସ୍ର ସହ ପ୍ରତିଷ୍ଠାତା କ୍ରିସ୍ ଗୋପାଳକୃଷ୍ଣନ୍ ଓ ଅନ୍ୟମାନଙ୍କ ବିରୁଦ୍ଧରେ ଅନୁସୂଚିତ ଜାତି ଏବଂ ଅନୁସୂଚିତ ଜନଜାତି (ଅତ୍ୟାଚାର ନିବାରଣ) ଆଇନ, ୧୯୮୯ ଅଧୀନରେ ଦାୟର ହୋଇଥିବା ଏଫଆଇଆରକୁ ଖାରଜ କରାଯାଇଛି । କୋର୍ଟ ଅଭିଯୋଗକୁ “ଆଇନର ପ୍ରକ୍ରିୟାର ଅପବ୍ୟବହାର’ ବୋଲି କହିଛନ୍ତି ଏବଂ ଅଭିଯୋଗକାରୀ ବିରୁଦ୍ଧରେ ଅପରାଧିକ ଅବମାନନା ମାମଲା ଆରମ୍ଭ କରିବାକୁ ଅନୁମତି ଦେଇଛନ୍ତି ।
ଜଷ୍ଟିସ୍ ହେମନ୍ତ ଚନ୍ଦନଗୌଡ ଏପ୍ରିଲ ୧୬ରେ ଏହି ଆଦେଶ ଦେଇ କହିଥିଲେ ଯେ ଅଭିଯୋଗଟି “ପ୍ରତିଶୋଧପୂର୍ଣ୍ଣ ପ୍ରୟାସ ଯାହା ଅଭିଯୁକ୍ତମାନଙ୍କୁ ଉତ୍ପୀଡ଼ନ ପାଇଁ କରାଯାଇଥିଲା ।’
ଏଫଆଇଆର୍ ଭାରତୀୟ ବିଜ୍ଞାନ ସଂସ୍ଥାନ (ଆଇଆଇଏସସି)ର ପୂର୍ବତନ ଅଧ୍ୟାପକ ଡି. ସନ୍ନା ଦୁର୍ଗାପ୍ପାଙ୍କ ଦ୍ୱାରା ଦାଖଲ କରାଯାଇଥିବା ଏକ ବ୍ୟକ୍ତିଗତ ଅଭିଯୋଗ ଉପରେ ଆଧାରିତ ଥିଲା, ଯିଏକି ୨୦୧୪ରେ ଯୌନ ଉତ୍ପୀଡ଼ନ ଅଭିଯୋଗର ଏକ ଆନ୍ତରିକ ତଦନ୍ତ ପରେ ଚାକିରିରୁ ବରଖାସ୍ତ ହୋଇଥିଲେ ।
କୋର୍ଟ ଅବଗତ ହୋଇଛନ୍ତି ଯେ ୨୦୧୫ରେ ହାଇକୋର୍ଟରେ ଚ୍ୟାଲେଞ୍ଜ କରାଯିବା ପରେ ବରଖାସ୍ତକୁ ପରବର୍ତୀ ସମୟରେ ଇସ୍ତଫା ଭାବରେ ପରିଣତ କରାଯାଇଥିଲା । ସେତେବେଳେ ସମାଧାନର ଏକ ଅଂଶ ଭାବେ ଦୁର୍ଗାପ୍ପା ସଂସ୍ଥା ଏବଂ ଏହାର ପ୍ରତିନିଧିମାନଙ୍କ ବିରୁଦ୍ଧରେ ସମସ୍ତ ଅଭିଯୋଗ ଏବଂ ଆଇନଗତ ପ୍ରକ୍ରିୟା ପ୍ରତ୍ୟାହାର କରିବାକୁ ସହମତ ହୋଇଥିଲେ ।
ଏହା ସତ୍ୱେ ସେ ଆଉ ଦୁଇଟି ଏଫଆଇଆର୍ ଦାଖଲ କରିଥିଲେ, ଯାହା ୨୦୨୨ ଏବଂ ୨୦୨୩ରେ ଖାରଜ କରାଯାଇଥିଲା । ବର୍ତମାନର ଏଫଆଇଆରରେ କୋର୍ଟ କହିଛନ୍ତି ଯେ ସମାନ ଅଭିଯୋଗ ଥିଲା ଏବଂ ଏହା ନ୍ୟାୟିକ ପ୍ରକ୍ରିୟାର ଅପବ୍ୟବହାର କରାଯାଇଥିଲା ।
ରାୟ ପ୍ରତି ପ୍ରତିକ୍ରିୟା ଦେଇ କ୍ରିସ୍ ଗୋପାଳକୃଷ୍ଣନ୍ କହିଛନ୍ତି ଯେ, “ମୋର ଆମ ଅଦାଲତ ଏବଂ ନ୍ୟାୟ ପ୍ରଣାଳୀ ଉପରେ ପୂର୍ଣ୍ଣ ବିଶ୍ୱାସ ଅଛି । ଏହି ରାୟ ପୁନର୍ବାର ପ୍ରମାଣିତ କରୁଛି ଯେ ନ୍ୟାୟପୂର୍ଣ୍ଣ ଏବଂ ନ୍ୟାୟିକ ପ୍ରଣାଳୀରେ ଆଇନର ଅପବ୍ୟବହାରର କୌଣସି ସ୍ଥାନ ନାହିଁ । ମୁଁ କୃତଜ୍ଞ ଯେ ମାନନୀୟ ହାଇକୋର୍ଟ ମିଥ୍ୟାକୁ ଦେଖିପାରିଛନ୍ତି ଏବଂ ସତ୍ୟକୁ ସ୍ଥାପିତ କରିଛନ୍ତି ।’
କୋର୍ଟ ଆହୁରି ମଧ୍ୟ କହିଛି ଯେ ଅଭିଯୋଗଗୁଡ଼ିକ ଅନୁସୂଚିତ ଜାତି/ଜନଜାତି (ଅତ୍ୟାଚାର ନିବାରଣ) ଆଇନ ଅଧୀନରେ କୌଣସି ଅପରାଧକୁ ଦର୍ଶାଉନାହିଁ ଏବଂ ଏହା ମୂଳତଃ ଏକ ଦେୱାନୀ ମାମଲା ଥିଲା, ଯାହାକୁ ଅପରାଧିକ ରୂପ ଦିଆଯାଇଥିଲା ।
ହାଇକୋର୍ଟ ଆହୁରି ମଧ୍ୟ କ୍ରିସ୍ ଗୋପାଳକୃଷ୍ଣନ୍ ଏବଂ ଅନ୍ୟ ଅଭିଯୁକ୍ତମାନଙ୍କୁ ଦୁର୍ଗାପ୍ପା ବିରୁଦ୍ଧରେ ଅପରାଧିକ ଅବମାନନା ମାମଲା ଆରମ୍ଭ କରିବା ପାଇଁ ଆଡଭୋକେଟ୍ ଜେନେରାଲ୍ଙ୍କ ନିକଟକୁ ଯିବାକୁ ଅନୁମତି ଦେଇଛି ।
