ଏୟାର ଇଣ୍ଡିଆରୁ ପୁଂଜି ପ୍ରତ୍ୟାହାରକୁ ଝଟକା
ଭୁବନେଶ୍ବର () କେନ୍ଦ୍ର ସରକାରଙ୍କ ଦ୍ବାରା ପରିଚାଳିତ ଏୟାର ଇଣ୍ଡିଆ ଉଡ଼ାଣ କମ୍ପାନୀର ୭୬ ପ୍ରତିଶତ ଅଂଶଧନ ବିକ୍ରି ପାଇଁ ହୋଇଥିବା ଟେଣ୍ଡର ଆହ୍ବାନରେ କୌଣସି କମ୍ପାନୀ ବା ବ୍ୟକ୍ତିବିଶେଷ ଆଗ୍ରହ ପ୍ରକାଶ କରିନାହାଁନ୍ତି । ଫଳରେ ବର୍ଷ ଶେଷ ସୁଦ୍ଧା ଏୟାର ଇଣ୍ଡିଆରୁ ପୁଞ୍ଜି ପ୍ରତ୍ୟାହାର ଯୋଜନା ଫସର ଫାଟିଛି । ଏଥିରୁ କେନ୍ଦ୍ର ସରକାର ୨୫ ହଜାର କୋଟି ଟଙ୍କା ଅର୍ଥ ରାଜସ୍ବ ଫେରିପାଇବାକୁ ଆଶା ରଖିଥିଲେ।
ଦେଶର ଏକମାତ୍ର ସରକାରୀ ବେସାମରିକ ବିମାନ ଚଳାଚଳ ସଂସ୍ଥା ଏୟାର ଇଣ୍ଡିଆର ଏବେକାର ଋଣ ପରିମାଣ ୩୩ହଜାର ୩୯୨ କୋଟି ଟଙ୍କା ରହିଛି । ଯେଉଁ କମ୍ପାନୀ ଏହାକୁ କିଣିଥାଆନ୍ତା ସେ ଏହି ଋଣଭାରକୁ ନିଜ ମୁଣ୍ଡ ଉପରକୁ ନେବା ପାଇଁ ନିୟମ ରହିଥିଲା । ହେଲେ ଏଥିପ୍ରତି ଅନାଗ୍ରହ ହେବାରୁ ମନ୍ତ୍ରିମଣ୍ଡଳ ଗୋଷ୍ଠି ତଥା ସ୍ବତନ୍ତ୍ର କ୍ଷମତା ଅଧିକାରୀ ଅଫିସରମାନେ ଏନେଇ ପୁଣିଥରେ ଆଲୋଚନା କରିବେ ବୋଲି ବିଭାଗ ପକ୍ଷରୁ ସୂଚନା ମିଳିଛି । ଟ୍ବିଟର ଯୋଗେ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, ଏବେ ଏହି ବିକ୍ରିୟ ପ୍ରକ୍ରିୟାକୁ ସାମୟିକ ବନ୍ଦ କରାଯାଇଛି । ସରକାର ଘୋଷଣା କରିଥିବା ସର୍ତ୍ତାବଳୀ ପ୍ରତି କେହି ଆଗ୍ରହ ପ୍ରକାଶ କରି ନଥିବାରୁ ଏବେ ଏଥିପାଇଁ ପୁନର୍ବିଚାର ହେବ ବୋଲି ସିଭିଲ୍ ଆଭିଏସନ୍ ସଚିବ ଆରଏନ୍ ଚୌବେ କହିଛନ୍ତି ।
