ଜାପାନରେ ହେବାକୁ ଥିବା ୨୦୨୪ ଏଫ୍ଆଇଏମ୍ ଏସିଆ ରୋଡ୍ ରେସିଂ ଚମ୍ପିଆନ୍ସିପ୍ର ତୃତୀୟ ପର୍ଯ୍ୟାୟ ପାଇଁ ହୋଣ୍ଡା ରେସିଂ ଇଣ୍ଡିଆ ଚାଳକ ପ୍ରସ୍ତୁତ
ଭୁବନେଶ୍ୱର: ଚଳିତ ସପ୍ତାହରେ ଜାପାନର ମୋବିଲିିଟି ରିସୋର୍ଟ ମୋଟେଗିଠାରେ ଅନୁଷ୍ଠିତ ହେବାକୁ ଥିବା ୨୦୨୪ ଏସିଆ ରୋଡ୍ ରେସିଂ ଚମ୍ପିଆନ୍ସିପ୍ର ତୃତୀୟ ପର୍ଯ୍ୟାୟ ପାଇଁ ହୋଣ୍ଡା ମୋଟରସାଇକଲ୍ ଆଣ୍ଡ ସ୍କୁଟର ଇଣ୍ଡିଆ (ଏଚଏମଏସଆଇ)ର ଆଇଡେମିସୁ ହୋଣ୍ଡା ରେସିଂ ଇଣ୍ଡିଆ ଟିମ୍ ପ୍ରସ୍ତୁତ ରହିଛି ।
ଚାମ୍ପିଆନ୍ସିପ୍ର ଏସିଆ ପ୍ରଡକ୍ସନ୍ ୨୫୦ ସିସି ବର୍ଗରେ ପୂର୍ବ ରାଉଣ୍ଡରେ ଚମତ୍କାର ପ୍ରଦର୍ଶନ ପରେ ଭାରତୀୟ ଦୁଇଚକିଆ ରେସିଂ ଟିମ୍ ୧୦ ପଏଂଟ୍ ସହ ଆଗାମୀ ରାଉଣ୍ଡରେ ପ୍ରବେଶ କରିଛି ।
ଚାଇନାର ଝୁହାଇ ଇଂଟରନ୍ୟାସନାଲ ସର୍କିଟରେ ରାଉଣ୍ଡ-୨ରେ ଏପି-୨୫୦ ଶ୍ରେଣୀର ରେସ୍-୧ରେ ଚେନ୍ନାଇର ପ୍ରତିଭାବାନ ଯୁବ ଖେଳାଳି କେଭିନ୍ କ୍ୱିଂଟାଲ ପ୍ରଶଂସନୀୟ ସ୍ଥାନ ହାସଲ କରି ଦଳ ପାଇଁ ଗୁରୁତ୍ୱପୂର୍ଣ୍ଣ ୫ ପଏଂଟ୍ ହାସଲ କରିଛନ୍ତି । ରେସ୍ରେ ଉଲ୍ଲେଖନୀୟ ନିରନ୍ତରତା ଏବଂ ଚତୁରତା ପ୍ରଦର୍ଶନ କରି କେଭିନ ଚଳିତ ଋତୁରେ ଆଉ ଏକ ଚମତ୍କାର ଶ୍ରେଷ୍ଠ ୧୫ ସ୍ଥାନ ହାସଲ କରିଛନ୍ତି । ସେପଟେ ତାଙ୍କ ସାଥୀ ଖେଳାଳି ମଲାପୁରମର ଯୁବ ଚାଳକ ମୋହସିନ ପି ଚୀନ୍ର ରେସ୍ ଟ୍ରାକ ରେ ନିଜର ସମ୍ପୂର୍ଣ୍ଣ ଦକ୍ଷତା ପ୍ରଦର୍ଶନ କରିଛନ୍ତି । ଖରାପ ପାଗ ଯୋଗୁଁ ରେସ୍-୨କୁ ବାତିଲ କରାଯାଇଥିଲା ।
କେଭିନ୍ କ୍ୱିଂଟାଲ କହିଛନ୍ତି ଯେ, “ଶେଷ ରେସ୍ କଠିନ ଥିଲା, କିନ୍ତୁ ମୁଁ ଶ୍ରେଷ୍ଠ ୧୫ରେ ରହି ଦଳକୁ ପଏଂଟ୍ ଯୋଗଦାନ କରିଥିବାରୁ ଖୁସି । ମୁଁ ଜାପାନରେ ଆଗାମୀ ଚ୍ୟାଲେଞ୍ଜକୁ ଉତ୍ସୁକତାର ସହ ଅପେକ୍ଷା କରିଛି । ସୁଜୁକା ସର୍କିଟ୍ ମୋ ପାଇଁ ଏକ ସ୍ୱତନ୍ତ୍ର ସ୍ଥାନ ରଖିଛି ଏବଂ ମୁଁ ନିଶ୍ଚିତ ଯେ ଆମେ ସେଠାରେ ଉନ୍ନତ ଫଳାଫଳ ହାସଲ କରିପାରିବୁ । ଆମର କଠୋର ପ୍ରଶିକ୍ଷଣ ଏବଂ ଅତୀତର ରେସ଼୍ରୁ ଶିଖିଥିବା ଶିକ୍ଷା ଆମକୁ ଅନ୍ତର୍ଜାତୀୟ ମାଟିରେ ଉନ୍ନତ ପ୍ରଦର୍ଶନ କରିବା ଦିଗରେ ମାର୍ଗଦର୍ଶନ କରିବ ।”
ମୋହସିନ ପରମବନ କହିଛନ୍ତି ଯେ, “ଏଆରଆରସିର ଦ୍ୱିତୀୟ ରାଉଣ୍ଡରେ ଚୀନରେ ୨୦ତମ ସ୍ଥାନରେ ରହିବା ମୋର ଲକ୍ଷ୍ୟ ନଥିଲା, କିନ୍ତୁ ମୁଁ ସ୍ୱୀକାର କରୁଛି ଯେ ପ୍ରତ୍ୟେକ ରେସ଼୍ ଶିଖିବାର ଅନୁଭୂତି ଭାବରେ କାମ କରେ । ମୋର ଲକ୍ଷ୍ୟ ଏବେ ତୃତୀୟ ରାଉଣ୍ଡରେ ମୋ ପ୍ରଦର୍ଶନକୁ ବଢ଼ାଇବା ଏବଂ ଦଳର ପଏଂଟ୍ ତାଲିକାରେ ଅଧିକ ଗୁରୁତ୍ୱପୂର୍ଣ୍ଣ ଯୋଗଦାନ ଦେବା ଉପରେ ରହିଛି ।”
