ମହାରାଷ୍ଟ୍ର ସଙ୍କଟ: ଶକ୍ତି ପରୀକ୍ଷା ନେଇ ରାଜ୍ୟପାଳଙ୍କ ନିର୍ଦ୍ଦେଶକୁ ଶିବସେନାର ଚ୍ୟାଲେଞ୍ଜ

ମହାରାଷ୍ଟ୍ରର କ୍ଷମତା ଲଢ଼େଇ ପୁଣି ଥରେ ସୁପ୍ରିମକୋର୍ଟରେ ପହଞ୍ଚିଛି। ଉଦ୍ଧବ ସରକାର ବିରୋଧରେ ଆସ୍ଥା ଭୋଟ ନେଇ ରାଜ୍ୟପାଳଙ୍କ ନିର୍ଦ୍ଦେଶକୁ ଶିବସେନା ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଛି। ଆଜି ସନ୍ଧ୍ୟା ୫ଟା ବେଳେ ଏହାର ଶୁଣାଣି କରିବାକୁ ସୁପ୍ରିମକୋର୍ଟ ରାଜି ହୋଇଛନ୍ତି।

ରାଜ୍ୟପାଳ ଭଗତ ସିଂହ କୋଶିୟାରି ବୁଧବାର ନିର୍ଦ୍ଦେଶ ଜାରି କରି ଜୁନ୍ ୩୦ ତଥା ଗୁରୁବାର ଦିନ ବିଧାନସଭାର ଏକ ସ୍ୱତନ୍ତ୍ର ଅଧିବେଶନ ଡାକିବାକୁ କହିଥିଲେ । ଉଦ୍ଧବ ଠାକରେ ସରକାରଙ୍କ ଫ୍ଲୋର ଟେଷ୍ଟ ଏହି ଅଧିବେଶନର ଏକମାତ୍ର ଏଜେଣ୍ଡା ହେବ ବୋଲି ରାଜ୍ୟପାଳ କହିଥିଲେ ।

ଉଦ୍ଧବ ଠାକରେ ନେତୃତ୍ଵାଧୀନ ‘ମହାବିକାଶ ଅଘାଡି’ ସରକାର ତରଫରୁ ଅଭିଷେକ ମନୁ ସିଂଘଭି ଆଜି ମଧ୍ୟାହ୍ନ ଭୋଜନ ପରେ ଏହି ମାମଲାର ଶୁଣାଣି ପାଇଁ ସୁପ୍ରିମକୋର୍ଟରେ ଆବେଦନ କରିଛନ୍ତି।

ଅଭିଷେକ ମନୁ ସିଂଘଭି ସର୍ବୋଚ୍ଚ ନ୍ୟାୟାଳୟଙ୍କୁ କହିଛନ୍ତି ଯେ ଆସନ୍ତାକାଲି ସକାଳ ୧୦ଟାରେ ଫ୍ଲୋର ଟେଷ୍ଟ ଅନୁଷ୍ଠିତ ହେବ ଏବଂ ଆଜି ସକାଳେ ଏଥିପାଇଁ ଏକ ବିଜ୍ଞପ୍ତି ଜାରି କରାଯାଇଛି।

ବିଚାରପତି ଜଷ୍ଟିସ ସୂର୍ଯ୍ୟକାନ୍ତ ସିଂଘଭିଙ୍କୁ ଯେଉଁ ଦଲିଲରେ ଫ୍ଲୋର ଟେଷ୍ଟ ଆସନ୍ତାକାଲି ହେବ ବୋଲି କୁହାଯାଇଛି ତାହା କେଉଁଠି ମିଳିବ ବୋଲି ପଚାରିଥିଲେ | ସିଂଘଭି କହିଥିଲେ ଯେ ସେ ଆଜି ଅପରାହ୍ନ ୨ ରୁ ୩ଟା ପର୍ଯ୍ୟନ୍ତ ସେ ସବୁ ସମ୍ବନ୍ଧୀୟ ଦଲିଲଗୁଡ଼ିକୁ ସର୍ବୋଚ୍ଚ ନ୍ୟାୟାଳୟକୁ ଦେବେ | ଏହା ପରେ ସର୍ବୋଚ୍ଚ ନ୍ୟାୟାଳୟ କହିଛନ୍ତି ଯେ ସମସ୍ତ ଆବଶ୍ୟକୀୟ ଦସ୍ତାବିଜ ଆଜି ଅପରାହ୍ନ ୪ଟା ସୁଦ୍ଧା ପ୍ରଦାନ କରାଯାଉ। ଏହା ପରେ ଆଜି ଏହି ମାମଲାର ଶୁଣାଣି ହେବ।

ଅନ୍ୟପକ୍ଷରେ ବିଦ୍ରୋହୀ ମନ୍ତ୍ରୀ ତଥା ନେତା ଏକନାଥ ସିନ୍ଦେ କହିଛନ୍ତି ଯେ ସେ ଏବଂ ତାଙ୍କ ସମର୍ଥକ ବିଧାୟକମାନେ ଆସନ୍ତାକାଲି ଫ୍ଲୋର୍ ଟେଷ୍ଟ ପାଇଁ ମୁମ୍ବାଇରେ ପହଞ୍ଚିବେ।

ସୂତ୍ରରୁ ପ୍ରକାଶ ଯେ ଏହି ବିଦ୍ରୋହୀ ବିଧାୟକମାନେ ଆଜି ଗୁଆହାଟିରୁ ଗୋଆ ଆସିବେ।

ମହାରାଷ୍ଟ୍ରର ମିଳିତ ସରକାରର ଏକ ଗୁରୁତ୍ୱପୂର୍ଣ୍ଣ ଅଂଶ ଶିବସେନାର ୩୯ ଜଣ ବିଧାୟକ ବିଦ୍ରୋହ କରି ଗୁଆହାଟୀର ଏକ ହୋଟେଲରେ ରହିଛନ୍ତି।