ଲୋକାର୍ପିତ ହେଲା ଗୋପାଳପୁର ବନ୍ଦର

କାଳିଆକୁ କେହି ବନ୍ଦ କରିପାରିବେ ନାହିଁ, ଏହା ଚାଷୀଙ୍କ ହକ

ଭୁବନେଶ୍ବର () ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ଗଂଜାମ ଜିଲ୍ଲା ଗସ୍ତ କରି ଗୋପାଳପୁର ଦୁଇଟି ବର୍ଥକୁ ଲୋକାର୍ପିତ କରିଛନ୍ତି । ଏହି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଯେ, ଏହାଦ୍ବାରା ବନ୍ଦର ଭିତ୍ତିଭୂମୀ କ୍ଷେତ୍ରରେ ନୂଆ ଅଧ୍ୟାୟ ସୃଷ୍ଟି ହୋଇଛି । ପାରାଦ୍ବିପରେ ବିଜୁ ବାବୁଙ୍କ ଦ୍ବାରା ବନ୍ଦର ଆରମ୍ଭ ହେବା ପରେ ଏବେ ଧାମରା, ସୁବର୍ଣ୍ଣରେଖା ଓ ଗୋପାଳପୁର ବନ୍ଦର ପ୍ରତିଷ୍ଠା ହୋଇଛି । ଏସବୁ ବନ୍ଦରଗୁଡିକ ଭିତ୍ତିଭୂମିର ଏକ ମୋତିମାଳା ଭଳି ସାମୁଦ୍ରିକ ବାଣିଜ୍ୟ କ୍ଷେତ୍ରରେ ଓଡିଶାର ବିକାଶକୁ ଏକ ନୂଆ ପରିଚୟ ଦେବ ।

ବର୍ତ୍ତମାନ ଗୋପାଳପୁର ବନ୍ଦରର ତିନୋଟି ବର୍ଥ କାର୍ଯ୍ୟକ୍ଷମ ହୋଇଛି । ଏଥିରେ ବର୍ଷକୁ 20 ନିୟୁତ ଟନ ପଣ୍ୟ କାରବାର ହୋଇପାରିବ । ଏହି ପୋର୍ଟ ଗଂଜାମ ଜିଲ୍ଲାର ଅର୍ଥନୈତିକ ଅଭିବୃଦ୍ଧିରେ ସହାୟକ ହେବା ସହ ପ୍ରତ୍ୟକ୍ଷ ଓ ପରୋକ୍ଷ ଭାବେ 8ହଜାର ଯୁବକ ଯୁବତୀ ନିଯୁକ୍ତି ସୁଯୋଗ ପାଇବେ । ପୂର୍ବ ଭାରତରେ ଏହି ପୋର୍ଟ ପଣ୍ୟ କାରବାରରେ ଏକ ପ୍ରମୁଖ ଭୂମିକା ଗ୍ରହଣ କରିବ । ବୋଲି ଏହି ଅବସରରେ ଆୟୋଜିତ ଏ ସଧାରଣ ସଭାକୁ ସମ୍ବୋଧିତ କରି ମୁଖ୍ୟମନ୍ତ୍ରୀ କହିଛନ୍ତି । ଏହି ବନ୍ଦର ପୂରା ଦକ୍ଷିଣ ଓଡିଶାର ଅର୍ଥନୈତିକ ଅଭିବୃଦ୍ଧିରେ ମଧ୍ୟ ଏକ ବଳିଷ୍ଠ ଭୂମିା ନେବ ବୋଲି ସେ କହିଛନ୍ତି ।

ଗୋପାଳପୁର ପୋର୍ଟ ନିଜର ପଣ୍ୟ କାରବାର କ୍ଷମତା 20 ନିୟୁତ ଟନକୁ ବୃଦ୍ଧି କରିଥିବା ବେଳେ ଏବେ ଏହା ସବୁ ଦିନିଆ ବନ୍ଦରରେ ପରିଣତ ହୋଇଛି । ଏହି ସଂପ୍ରସାରଣରେ 2ହଜାର କୋଟି ଟଙ୍କାର ପୂଂଜି ନିବେଶ ହୋଇଥିବା ବେଳେ 2025 ସୁଦ୍ଧା ବନ୍ଦରର କ୍ଷମତା 55 ନିୟୁତ ଟନକୁ ବୃଦ୍ଧି କରିବାକୁ ଲକ୍ଷ ରଖାଯାଇଛି । ଏହାଦ୍ବାରା ଏବେ ସାପୁରଜୀ ପାଲୋନଜୀ ପୋର୍ଟ ଭାରତୀୟ କୋଷ୍ଟର ଉଭୟ ପଟେ କାର୍ଯ୍ୟ କରିବ ବୋଲି ଏହାର ପରିଚାଳନା ନିର୍ଦ୍ଦେଶକ ଅମିତ ସାବୋ କହିଥିଲେ ।

2017ରେ ସାପୁରଜୀ ପୋଲୋନଜୀ ଗ୍ରୁପ ଏହି ବନ୍ଦରର ବୃହତ ଅଂଶିଦାର ଭାବେ 2000 କୋଟି ଟଙ୍କାର ପୁଂଜିନିବେଶ କରି ସଂପ୍ରସାରଣ କାର୍ଯ୍ୟ ଆରମ୍ଭ କରିଥିଲା । ପାରାଦ୍ବୀପ ଓ ଭାଇଜାଗ ବନ୍ଦର ମଧ୍ୟରେ ଗୋପାଳପୁର ରହିଥିବାରୁ ପୂର୍ବ ଉପକୂଳରେ ସମୁଦ୍ରପଥରେ ବଣ୍ୟ କାରବାରରେ ଏକ ଗୁରୁତ୍ବପୂର୍ଣ୍ଣ ଦାୟିତ୍ବ ବହନ କରିବ ବୋଲି ବନ୍ଦରର ସିଇଓ କ୍ୟାପଟେନ ସନ୍ଦିପ ଅଗ୍ରୱାଲ କହିଛନ୍ତି ।

ଏହାପରେ ମୁଖ୍ୟମନ୍ତ୍ରୀ ଶେରଗଡ ଗସ୍ତ କରି 172 କୋଟି ଟଙ୍କାର ହରଭଙ୍ଗୀ ଜଳସେଚନ ପ୍ରକଳ୍ପର ଉନ୍ନତିକରଣ ପାଇଁ ଭିତ୍ତିପ୍ରସ୍ତର ରଖିଥିଲେ । ଏହାପରେ ସାନଖେମୁଣ୍ଡୁ ଗସ୍ତ କରି ସାନଖେମୁଣ୍ଡି ଓ ଧରାକୋଟ ବ୍ଲକ ପାଇଁ 13ଟି ପାନୀୟ ଜଳ ପ୍ରକଳ୍ପର ଭିତ୍ତିପ୍ରସ୍ତର ରଖିଥିଲେ । ଧରାକୋଟରେ ଏକ ଡିଗ୍ରୀ କଲେଜ ପ୍ରତିଷ୍ଠା କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଥିଲେ । ପରେ ମୁଖ୍ୟମନ୍ତ୍ରୀ ଗଜପତି ଜିଲ୍ଲା ଗସ୍ତ କରି ସେଠାରେ 48.84 କୋଟି ଟଙ୍କାର 57ଟି ପ୍ରକଳ୍ପ ଉଦଘାଟନ କରିବା ସହ 582.40 କୋଟି ଟଙ୍କାର 783ଟି ପ୍ରକଳ୍ପ ପାଇଁ ଭିତ୍ତିପ୍ରସ୍ତର ରଖିଥିଲେ ।

ଏହିଅବସରରେ ରାଜ୍ୟ ସରକାରଙ୍କ ବିଭିନ୍ନ ବିକାଶମୂଳକ ଯୋଜନା ସଂପର୍କରେ ଆଲୋକପାତ କରିବା ସହ ମୁଖ୍ୟମନ୍ତ୍ରୀ କହିଥିଲେ ଯେ, କାଳିଆ ଯୋଜନାରେ ଆଉ 10 ଲକ୍ଷ ଚାଷୀ ପରିବାର ସାମିଲ ହେବେ । କାଳିଆ ଯୋଜନା ବନ୍ଦ ହୋଇଯିବ ବା ଏହି ଯୋଜନା ଟଙ୍କା ଫେରାଇବାକୁ ହେବ ବୋଲି ଯେଉଁ ଅପପ୍ରଚାର ଚାଲିଛି ତାହା ସଂପୁର୍ଣ୍ଣ ମିଛି ବୋଲି କହିଥିଲେ । ଏଥିସହିତ କାଳିଆ ଯୋଜନାକୁ କେହି ବନ୍ଦ କରିପାରିବେ ନାହିଁ, ଏହା ଚାଷୀମାନଙ୍କ ହକ, ଚାଷୀମାନଙ୍କ ଟଙ୍କା ଓ ଏହାକୁ ସେମାନେ ଚାଷ କାମରେ ଲଗାଇବେ ବୋଲି ମୁଖ୍ୟମନ୍ତ୍ରୀ କହିଥଇଲେ ।