ନଭେମ୍ବର ୨୦୨୦ରେ ସରିବ ବ୍ରହ୍ମଣୀ ସେତୁ

ଜଙ୍ଗଲ ଅନୁମତି, ଜମି ଅଭାବରୁ ଆଗେଇ ପାରୁନି ପ୍ରକଳ୍ପ

ନୂଆଦିଲ୍ଲୀ () ଓଡ଼ିଶା ଦେଇ ଯାଇଥିବା ୨୩ ନଂ ଜାତୀୟ ରାଜପଥ (ନୂତନ ୧୪୩ ନମ୍ବର ଜାତୀୟ ରାଜପଥ)ର ବୀରମିତ୍ରପୁର-ବାରକୋଟ ସେକ୍ସନ ଅନ୍ତର୍ଗତ ରାଉରକେଲା ନିକଟବର୍ତୀ ବ୍ରାହ୍ମଣୀ ସେତୁରେ ଏକ ୬ ଲେନ୍ ବିଶିଷ୍ଟ ସେତୁ ନିର୍ମାଣ ପାଇଁ ଯୋଜନା କରାଯାଇଛି  । ବର୍ତମାନ ରାଉରକେଲା ସହର ନିକଟବର୍ତୀ ଏହି ନଦୀରେ ଏକ ଦୁଇ ଲେନ ବିଶିଷ୍ଟ ସେତୁ ରହିଛି, ମାତ୍ର ଏଥିରେ ପ୍ରବଳ ଗାଡ଼ି ଭିଡ଼ ପରିଲକ୍ଷିତ ହେଉଛି । ଭବିଷ୍ୟତର ଟ୍ରାଫିକ ବୃଦ୍ଧି ଏବଂ ରାଉରକେଲା ସହରର ଦୀର୍ଘ ଅଭିବୃଦ୍ଧି ସମ୍ଭାବନାକୁ ଆଖି ଆଗରେ ରଖି ଏହି ୨ ଲେନ ବିଶିଷ୍ଟ ସେତୁକୁ ୬ ଲେନ ବିଶିଷ୍ଟ କରିବା ଲାଗି ଯୋଜନା କରାଯାଇଛି  । ପ୍ରକଳ୍ପର ଦ୍ରୁତ କାର୍ଯ୍ୟକାରୀତା ଉଦ୍ଦେଶ୍ୟରେ ବୀରମିତ୍ରପୁର ବାରକୋଟ ଅଂଶକୁ ତିନୋଟି ନିର୍ମାଣ ପ୍ୟାକେଜରେ ବିଭକ୍ତ କରାଯାଇଛି  । ସମସ୍ତ ତିନୋଟି ପ୍ୟାକେଜକୁ ଇପିସି ଠିକା ଆଧାରରେ ନିଆଯାଇଛି  । ଏହି ପ୍ୟାକେଜ ମଧ୍ୟରେ ରହିଛି- ୧- ବୀରମିତ୍ରପୁର ବ୍ରାହ୍ମଣୀ ସେତୁ ଶେଷ ଭାଗ, ୨- ବ୍ରାହ୍ମଣୀ-ରାଜାମୁଣ୍ଡା ପ୍ୟାକେଜ ଏବଂ ୩- ରାଜାମୁଣ୍ଡା ବାରକୋଟ ପ୍ୟାକେଜ  । ବ୍ରାହ୍ମଣୀ ନଦୀ ଉପରେ ପ୍ରସ୍ତାବିତ ନୂତନ ୬ ଲେନ ବିଶିଷ୍ଟ, ୪୭୩ ମିଟର ଲମ୍ବ ସେତୁ ପ୍ରକଳ୍ପ ୧ ନମ୍ବର ପ୍ୟାକେଜ ଅଧୀନରେ ରହିଛି  ।

ଜମି ଅଧିଗ୍ରହଣ ଏବଂ ଜଙ୍ଗଲ ଅନୁମତି କାରଣରୁ ଏହି ପ୍ରକଳ୍ପ ବିଳମ୍ବିତ ହୋଇଛି  । ୧୫.,୦୯.୨୦୧୫ରେ ଏହି ପ୍ରକଳ୍ପ (ବୀରମିତ୍ରପୁର ବାରକୋଟ ଭାଗ) ପାଇଁ ଜଙ୍ଗଲ ଅନୁମତି  ନିମନ୍ତେ ଆବେଦନ କରାଯାଇଥିଲା । ଏହାକୁ ଜଙ୍ଗଲ ଓ ପରିବେଶ ମନ୍ତ୍ରଣାଳୟର ଅନୁମୋଦନ ପାଇଁ ପଠାଯିବା ପୂର୍ବରୁ ଏହା ରାଜ୍ୟ ସରକାରଙ୍କ ନିକଟରେ ପଡ଼ିରହିଥିଲା । ୦୪.୦୫.୨୦୧୮ରେ ଜଙ୍ଗଲ ଓ ପରିବେଶ ମନ୍ତ୍ରଣାଳୟ ଏହି  ପ୍ରକଳ୍ପକୁ ଏକକ-୧ ଅନୁମତି ଦେଇଥିଲେ । ବ୍ରାହ୍ମଣୀ ସେତୁ ଉପରେ କାର୍ଯ୍ୟ ମେ ୨୦୧୮ରେ ଆରମ୍ଭ ହୋଇଥିଲା ଏବଂ ଏହାକୁ ୨୦୨୦ ନଭେମ୍ବର ସୁଦ୍ଧା ଶେଷ କରିବା ଲାଗି ଲକ୍ଷ୍ୟ ରଖାଯାଇଛି  । ଅନ୍ୟ ଦୁଇଟି ପ୍ୟାକେଜ- ବ୍ରାହ୍ମଣୀ-ରାଜାମୁଣ୍ଡା ଏବଂ ରାଜାମୁଣ୍ଡା-ବାରକୋଟ ପ୍ରକଳ୍ପ ପାଇଁ ୨୨.୦୫.୨୦୧୮ରେ ଅନୁମୋଦନ ମିଳିଛି ଏବଂ ଏଥିପାଇଁ ଯଥାକ୍ରମେ ୩୬୬.୫୬ କୋଟି ଏବଂ ୩୯୪ କୋଟି ଟଙ୍କା ଖର୍ଚ୍ଚ କରାଯିବ । ଆହୁରି, ଜାତୀୟ ରାଜପଥ ଆଇନ ୩ ଜି ଭାଗ ଅଧୀନରେ ସେତୁ ନିକଟବର୍ତୀ ଜମି ପାଇଁ ଦିଆଯାଉଥିବା ଖର୍ଚ୍ଚ ଅନୁମୋଦନ ଲାଭ କରିସାରି ୬୪.୮୮ କୋଟି ଟଙ୍କା ଉପଯୁକ୍ତ କର୍ତୃପକ୍ଷଙ୍କ ନିକଟରେ ଜମା କରାଯାଇସାରିଥିଲେ ହେଁ, ସିଏଏଲଏ ଠାରୁ ବର୍ତମାନ ସୁଦ୍ଧା ସ୍ଥାନ ଅଧୀଗ୍ରହଣ ହୋଇପାରିନାହିଁ  । ବ୍ରାହ୍ମଣୀ ନଦୀ ପାଇଁ ମୋଟ ୧୪.୮୮ ହେକ୍ଟର ଜମି ଅଧୀଗ୍ରହଣ କରାଯିବ, ଏଥିରେ ତିନୋଟି ଗ୍ରାମ- ବ୍ରାହ୍ମଣୀ ତରଙ୍ଗ, ଦାଣ୍ଡିଆପଲ୍ଲୀ ଏବଂ ଆରଟିୟୁ ୪୧ର ୯.୪୬ ହେକ୍ଟର ଘରୋଇ ଜମି ଏବଂ ୫.୩୯ ହେକ୍ଟର ସରକାରୀ ଜମି ରହିଛି  ।

ଏହାବ୍ୟତୀତ ଜଙ୍ଗଲ ଅନୁମତି ଏବଂ ୯୦% ଜମି ଅଧୀଗ୍ରହଣ ହୋଇପାରିନଥିବାରୁ ଓଡ଼ିଶାରେ ୫୮୩ କିମି ଲମ୍ବ ଏବଂ ୭୬୦୦ କୋଟି ଟଙ୍କାର ଅନ୍ୟ ୯ଟି ପ୍ରକଳ୍ପ କାର୍ଯ୍ୟ ମଧ୍ୟ  ଦୁଇ ବର୍ଷ ହେବ ବିଳମ୍ବିତ ହୋଇଛି  ।