ବିଜେପି କର୍ମୀଙ୍କ ବିରୋଧରେ ଥାନାରେ ଏତଲା ଦେଲେ ବିଜେଡ଼ି କର୍ମୀ

ଅନୁଗୁଳ: ଅନୁଗୁଳ ଟିକାକରଣ କେନ୍ଦ୍ରରେ ନବୀନଙ୍କ ପୋଷ୍ଟର ଚିରିବାକୁ ନେଇ ତେଜିଲା ବିବାଦ । ଥାନାରେ ପହଁଚିଲା ମାମଲା । ବିଜେପି କର୍ମୀଙ୍କ ବିରୋଧରେ ଅଭିଯୋଗ କଲେ ବିଜେଡି କର୍ମୀ । ଜିଲ୍ଲା ପ୍ରଶାସନ ପକ୍ଷରୁ ଥାନାରେ ଅଭିଯୋଗ । ଗତକାଲି ଅନୁଗୁଳ ଷ୍ଟାଡିୟମରେ ଟିକାକରଣ କେନ୍ଦ୍ରରେ ମୁଖ୍ୟମନ୍ତ୍ରୀଙ୍କ ପୋଷ୍ଟର ଲାଗିବାକୁ ବିରୋଧ କରି ପାଟିତୁଣ୍ଡ କରିବା ସହ ଚିରି ଦେଇଥିଲେ ବିଜେପି କର୍ମୀ ଏବଂ ପ୍ରଧାନମନ୍ତ୍ରୀ ମୋଦିଙ୍କ ପୋଷ୍ଟର ଲଗାଇବାକୁ ଦାବି କରିଥିଲେ ।
ସୂଚନା ଥାଉକି, ଗତକାଲିଠାରୁ କ୍ୟାମ୍ପେନ ମୋଡରେ ଆରମ୍ଭ ହୋଇଛି ଟିକାଦାନ । ଟିକାକେନ୍ଦ୍ରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୋଷ୍ଟର ମରାଯାଇଛି । ଯାହାକୁ ବିରୋଧ କରିଛନ୍ତି ବିଜେପି କର୍ମୀ । ପ୍ରଧାନମନ୍ତ୍ରୀ ପୋଷ୍ଟର ଲଗାଯାଉ ବୋଲି ସେମାନେ ଯୁକ୍ତି ବାଢ଼ିଛନ୍ତି । ତେବେ ଗତକାଲି ପ୍ରଥମେ ବାଲେଶ୍ୱରରେ ଦେଖିବାକୁ ମିଳିଥିଲା ଏହି ବିବାଦ । ପରେ ପରେ ଜୟପୁର, ରାୟଗଡ଼ା, ଅନୁଗୁଳ ଓ ଆଜି ବ୍ରହ୍ମପୁରରେ ପ୍ରତିବାଦ ଦେଖିବାକୁ ମିଳିଛି ।