କର୍ଣ୍ଣାଟକରେ ହୃଦୟ ବିଦାରକ ଘଟଣା: ଭୂସ୍ଖଳନରେ ୬ ମୃତ
କର୍ଣ୍ଣାଟକର ଉତ୍ତର କନ୍ନଡ ଏବଂ ଦକ୍ଷିଣ କନ୍ନଡ ଜିଲ୍ଲାରେ ଘଟିଥିବା ଭୂସ୍ଖଳନରେ ଦୁଇ ଭଉଣୀଙ୍କ ସମେତ ୬ ଜଣଙ୍କର ମୃତ୍ୟୁ ହୋଇଛି । ପୋଲିସ ସୂଚନା ଅନୁଯାୟୀ ମୃତକଙ୍କ ମଧ୍ୟରେ ଦୁଇ ଭଉଣୀଙ୍କ ମୃତଦେହ ପରସ୍ପରର ହାତ ଧରିଥିବା ଅବସ୍ଥାରେ ଉଦ୍ଧାର କରାଯାଇଛି।
ପୋଲିସ ସୂତ୍ରରୁ ପ୍ରକାଶ ଯେ ଉତ୍ତର କନ୍ନଡ ଜିଲ୍ଲାର ଭଟକଲ ତାଲୁକା ଅନ୍ତର୍ଗତ ମୁତାଲି ଗ୍ରାମରେ ଏକ ପର୍ବତରୁ ବିରାଟ ମାଟି ଅତଡ଼ା ସେମାନଙ୍କ ଘରେ ଖସିପଡିବାରୁ ପରିବାରର ଚାରିଜଣ ସଦସ୍ୟଙ୍କର ମୃତ୍ୟୁ ହୋଇଥିଲା। ଦ୍ୱିତୀୟ ଘଟଣା ଦକ୍ଷିଣ କନ୍ନଡ ଜିଲ୍ଲାର ସୁବ୍ରମଣ୍ୟମରେ ଘଟିଥିଲା ଯେଉଁଠାରେ ଦୁଇ ଭଉଣୀଙ୍କ ମୃତଦେହ ପରସ୍ପରର ହାତ ଧରିଥିବାର ଦେଖିବାକୁ ମିଳିଥିଲା। ପର୍ବତର ଏକ ଅଂଶ ସେମାନଙ୍କ ଘରେ ପଡ଼ିବା ପରେ ଦୁଇ ଭଉଣୀଙ୍କର ମୃତ୍ୟୁ ହୋଇଥିଲା।
ଦୀର୍ଘ ସମୟ ଧରି ଉଦ୍ଧାର କାର୍ଯ୍ୟ ପରେ ୧୧ ବର୍ଷୀୟା ଶ୍ରୁତି ଏବଂ ୬ ବର୍ଷର ଜ୍ଞାନଶ୍ରୀଙ୍କ ମୃତଦେହ ଉଦ୍ଧାର କରାଯାଇଛି ବୋଲି ପୋଲିସ କହିଛି। ସୋମବାର ଏହି ଦୁର୍ଘଟଣା ଘଟିଥିଲା ଏବଂ ମୃତ ଝିଅମାନଙ୍କ ପିତାଙ୍କ ନାମ କୁସୁମଧର। ସେ କହିଛନ୍ତି ଯେ ସୋମବାର ସନ୍ଧ୍ୟା ଠାରୁ ସୁବ୍ରମଣ୍ୟରେ ପ୍ରବଳ ବର୍ଷା ହୋଇଥିଲା । ସନ୍ଧ୍ୟା ପ୍ରାୟ ସାଢ଼େ ୭ଟାରେ ପ୍ରଚଣ୍ଡ ଶବ୍ଦ ଶୁଣାଗଲା । ସେତେବେଳେ ଘରର ବାରଣ୍ଡାରେ ବସି ପାଠ ପଢୁଥିବା ଶ୍ରୁତି ଭିତରୁ ଶବ୍ଦ ଆସୁଥିବାର ଭାବି ଘର ଭିତରକୁ ଦୌଡ଼ି ଯାଇଥିଲା ।
ସେ କହିଛନ୍ତି ଯେ ଜ୍ଞାନଶ୍ରୀ ମଧ୍ୟ ଘର ଭିତରକୁ ଦୌଡ଼ିଥିଲେ ଏବଂ ସେହି ସମୟରେ ତାଙ୍କ ଘର ଉପରେ ପାହାଡ଼ରୁ ମାଟି ଅତଡ଼ା ଖସି ପଡିଯାଇଥିଲା। ଘଟଣା ସମୟରେ ରୋଷେଇ ଘରେ କାମ କରୁଥିବା ଝିଅଙ୍କ ମା’ ତାଙ୍କ ପିଲାମାନେ ବାହାରେ ଅଛନ୍ତି ବୋଲି ଭାବି ବାହାରକୁ ଆସିଥିଲେ।
ପୋଲିସ ସୂତ୍ରରୁ ପ୍ରକାଶ ଯେ ରାସ୍ତାରେ ଗଛ ଓ ପାଣି ପଡିଥିବାରୁ ତୁରନ୍ତ ରିଲିଫ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ପାରିନଥିଲେ। ବର୍ଷା ଯୋଗୁଁ ଉଦ୍ଧାର କାର୍ଯ୍ୟ ମଧ୍ୟ ପ୍ରଭାବିତ ହୋଇଥିଲା ବୋଲି ସେ କହିଛନ୍ତି।
