ଏସ୍ବିଆଇ ପକ୍ଷରୁ ବିଦେଶ ରେମିଟାନ୍ସ ପାଇଁ ଭିମ୍ ଏସ୍ବିଆଇପେ’ର ଶୁଭାରମ୍ଭ
ଭୁବନେଶ୍ୱର: ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ସିଙ୍ଗାପୁର ପ୍ରଧାନମନ୍ତ୍ରୀ ଲି ସିନ୍ ଲୁଙ୍ଗ୍ ଭାରତ ଓ ସିଙ୍ଗାପୁର ମଧ୍ୟରେ ବାସ୍ତବ ସମୟ ପେମେଂଟ୍ ବ୍ୟବସ୍ଥାର ଶୁଭାରମ୍ଭ କରିଛନ୍ତି । ୟୁପିଆଇ ଓ ପେ’ନାଓ ଜରିଆରେ ଏହି ବ୍ୟବସ୍ଥା ସୁଦୃଢ଼ ହୋଇଛି । ଏହି ସୀମାପାର ପେମେଂଟ୍ ବ୍ୟବସ୍ଥାରେ ସହଯୋଗୀ ହୋଇଥିବାରୁ ଭାରତର ସର୍ବବୃହତ ବ୍ୟାଙ୍କ ଭାରତୀୟ ଷ୍ଟେଟ୍ ବ୍ୟାଙ୍କ ଗର୍ବିତ ମନେ କରୁଛି । ଏସବିଆଇ ଭିମ୍ ଏସ୍ବିଆଇପେ ମୋବାଇଲ୍ ଆପ୍ ଜରିଆରେ ଏହିସେବା ପ୍ରଦାନ କରାଯାଉଛି । ୟୁପିଆଇ ଆଇଡିକୁ ବ୍ୟବହାର କରି ସିଙ୍ଗାପୁରରୁ ଭାରତକୁ ଏବଂ ପଂଜୀକୃତ ମୋବାଇଲ୍ ନମ୍ବର ଜରିଆରେ ଭାରତରୁ ସିଙ୍ଗାପୁରକୁ ପାଣ୍ଠି ପଠାଇହେବ ।
ଭାରତ ଓ ସିଙ୍ଗାପୁର ମଧ୍ୟରେ ସୀମାପାର ପେମେଂଟ୍ ପାଇଁ ଭିତିଭୂମି ବିକାଶ କରିବା ଦିଗରେ ୟୁପିଆଇ ପେ’ନାଓ ଲିଙ୍କେଜ୍ ହେଉଛି ଏକ ଗୁରୁତ୍ୱପୂର୍ଣ୍ଣ ମାଇଲଖୁଂଟ । ଦ୍ରୁତ, ସୁଲଭ ଓ ଅଧିକ ସ୍ୱଚ୍ଛ ସୀମାପାର ପେମେଂଟ୍କୁ ଆଗକୁ ବଢାଇବା ଲାଗି ଜି୨୦ ଦେଉଥିବା ପ୍ରାଥମିକତା ଅନୁସାରେ ଏହି ସୁବିଧା ଆରମ୍ଭ କରାଯାଇଛି । ବିଶ୍ୱବ୍ୟାଙ୍କ ଦ୍ୱିପାକ୍ଷିକ ରେମିଟାନ୍ସ ମେଟ୍ରିକ୍ସ ଡିସେମ୍ବର ୨୦୨୨ ଅନୁସାରେ ୨୦୨୧ରେ ସିଙ୍ଗାପୁର ଓ ଭାରତ ମଧ୍ୟରେ ଅନ୍ତର୍ଦେଶୀୟ ରେମିଟାନ୍ସ ପରିମାଣ ଥିଲା ୯୪୯ ନିୟୁତ ଡଲାର ।
ପ୍ରଥମ ସୀମାପାର କାରବାରକୁ ଭାରତୀୟ ରିଜର୍ଭ ବ୍ୟାଙ୍କର ଗଭର୍ଣ୍ଣର ଶକ୍ତିକାନ୍ତ ଦାସ ଓ ମନେଟାରି ଅଥରିଟି ଅଫ୍ ସିଙ୍ଗାପୁର ରବି ମେନନଙ୍କ ଦ୍ୱାରା ସମ୍ପାଦିତ କରାଯାଇଥିଲା । ଭିମ୍ ଏସ୍ବିଆଇପେ’କୁ ଶକ୍ତିକାନ୍ତ ବ୍ୟବହାର କରିଥିଲେ ।
ମାନ୍ୟବର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ, “ଭାରତ ଓ ସିଙ୍ଗାପୁରର ଦୁଇ ପେମେଂଟ୍ ବ୍ୟବସ୍ଥା ମଧ୍ୟରେ ସଂଯୋଗ ସ୍ଥାପନ ଦ୍ୱାରା ଏହି ଦୁଇ ଦେଶର ବାସିନ୍ଦାମାନେ ଦ୍ରୁତ ଓ ଅଧିକ ସୁଲଭ ମୂଲ୍ୟରେ ସୀମାପାର ରେମିଟାନ୍ସ ପେମେଂଟ୍ କରିପାରିବେ । ଏହା ସିଙ୍ଗାପୁରରେ ଥିବା ଭାରତୀୟ, ପେସାଦାର, ଛାତ୍ରଛାତ୍ରୀ ଏବଂ ଶ୍ରମିକମାନଙ୍କୁ ସଙ୍ଗାପୁରରୁ ଭାରତକୁ ଏବଂ ଭାରତରୁ ସିଙ୍ଗାପୁରକୁ ସୁଲଭ ମୂଲ୍ୟରେ ତତ୍କାଳ ପାଣ୍ଠି ସ୍ଥାନାନ୍ତର କରିପାରିବେ ।’’
ସିଙ୍ଗାପୁରର ପ୍ରଧାନମନ୍ତ୍ରୀ ଲି ସିନ୍ ଲୁଙ୍ଗ୍ କହିଛନ୍ତି ଯେ, “ସିଙ୍ଗାପୁର ଓ ଭାରତ ମଧ୍ୟରେ ସୀମାପାର ଖୁଚୁରା ପେମେଂଟ୍ ଓ ରେମିଟାନ୍ସ ପରିମାଣ ହେଉଛି ବାର୍ଷିକ ୧ ବିଲିଅନ୍ ଡଲାରରୁ ଅଧିକ । ଆମେ ପ୍ରଗତିଶୀଳ ଭାବେ ଅଧିକ ବ୍ୟବହାରକାରୀ ଏବଂ ମାମଲା ଯୋଡ଼ୁଥିବା ବେଳେ ୟୁପିଆଇ-ପେନାଓ ଲିଙ୍କେଜ୍ ବ୍ୟବହାରକାରିତାକୁ ବଢ଼ାଇବ ଏବଂ ଆମ ବାଣିଜ୍ୟ ଓ ଲୋକଙ୍କ ମଧ୍ୟରେ ସମ୍ପର୍କ ସ୍ଥାପନ କରିବାରେ ସହାୟକ ହେବ ।’’
ଭାରତୀୟ ଷ୍ଟେଟ୍ ବ୍ୟାଙ୍କର ଅଧ୍ୟକ୍ଷ ଦୀନେଶ ଖାରା କହିଛନ୍ତି ଯେ, “ଏହି ଚମତ୍କାର ଅଭିଯାନ ସହ ଯୋଡ଼ି ହୋଇଥିବାରୁ ଆମେ ଅତ୍ୟନ୍ତ ଗର୍ବିତ । ଭାରତ ସରକାରଙ୍କ ଡିିଜିଟାଇଜେସନ୍ ଅଭିଯାନକୁ ସୁଦୃଢ଼ କରିବାରେ ଏହା ସୁଦୂର ପ୍ରସାରୀ ସାବ୍ୟସ୍ତ ହେବ ଏବଂ ବ୍ୟବହାରକାରୀମାନଙ୍କୁ ସହଜ ଏବଂ ନିରବିଚ୍ଛିନ୍ନ ସୀମାପାର ପେମେଂଟ୍ ସୁବିଧା ପ୍ରଦାନ କରିବ ।’’
